,فلاش باك
كان يا ماكان ’مشهد قدومي ازمان زمان ازمان بكل ايام اسود وابيض ’ فترة الخمسينات *ايام الحنَ والرحمة *والناس كيف ابدت بتتعلم وثتقف وتنوض للدنيا وكل شيء عندهم حرام ؤعيب **وخصوصي كان شافوا شيء اغريب.
عمك الفقي سليمان*صاحب محل ؤدكان * جاب راديون ’لا قاته الحاجة وهي اتزغرت من الفرحة صحيت صحيت
ياباهي ’ الله يأخد بخاطرك طيبت خاطري ’وجبتلي هل المونس’وين انضم وين انكنس ’ وبدت اتغني
’وعلي الحولي **داخت صبو عليها المي
ياما ’
وعلي الحولنيَ * جابلها رديون اغني* من تونس حتى لاهني
ياما ..اغنية زكار
ؤجابت تستمال وربطاته علي خصر ابنيتها صغيرة
فرحانة بيها فرحة كبيرةوتصفق وتقول
غير ارقص ياسمح اللون ***والبابا جاب الراديون
فتح الفقي الراديون وسمعواالخبر الجيران وخوته ؤاولاد عمه وجوا فازعين’دورا وكل لحباب ملتمين = هذا ايقول
مبروك ا لثاني ايقول مشكوك ’وسمع بعمك سليمان بوه جاه من الجبل يجري ’من الفجر بدري ’ وقاله آه كثروا اقروشك ’*جبت العيب والخراب لي حوشك’*هذا عيب وهذا حرام ’واحني من امة الاسلام
هذا احرام صنع نصارى ** للمسلمين اخسارة
هذا حرام صنع الكفار للكفار * يبوا يهلكوا الصغار* ورد عليه بالشوية
غير اسمع
يابا با) هذا اجيب في جميع الاخبار’من كل لقطار ’حتى اخبر جربة وضفار ’ ويقرأ في كتاب القرآن وحديث مروي على افلان بن فلان ’ ويخبرفينا على الحروب* المتكسر والمعطوب وتوه
بيحكي على حرب بور سعيد *’اسمع اللي صاير وجديد *
ارتاح الشيخ وطمان ’اتربع وسمع النشرة ’*هو وضناويه العشرة ’*والعجوزة اعطت بقفاها ’على الراديون* ولوطة ارداها’وبعد العيلة ثم اعشاها *والشاهي امرغي صبوله *مبروك ان شاء الله قالوله *ادوم اهناها *دارك والراديون امعاها *
* *العجوزة قالت =ياولادي* منكم غادي *الراجل ايصيَح وينادي *ردوا اعليه اكلام امقادي ؤقولوله *اجواب امسقم في ؤوصوله
ضحكوا بسرعة =جي المجرادي *قفلوهوله * على خير تصبح ودوله *وكل واحد امتدَ على طوله
في الصبحية امشوا الرجالة *كل واحد عنده اشغاله * ادندن والحاجة شغالة * دورا ؤخشوا انساوين * وحدة في جرتها اتنين *اللي اتبارك *واللي اطمطق في السينها ياكبيدتي مبهاه ومبها اكلامه * وياسعد من اصبح جي قدامه* واللي اتزم في شاربها * ياربي قداش اعجبها *وتقول * اللي قده قد المهراس * واكلامه زي التراس
سبحان الله كيف يتكلم ’واحد ة اتقول = ياوخيتي اخلاص الدنيا جابت ماعندها = وقولة الله وقولة اللي عنده البنات مايلزماش *اجيب الكدر والغشاش * يتعلموا الشيء اللي مهناش
وبره يازمان اتعالى يازمان *اقعد الراديو في كل امكان * بره بره والناس اكلها اشرت واصبح الراديو لازم في كل حوش ويدرجح حتى في رقبة الراعي ودرجحوه في رقبة الحمار حاشاكم في ايام الزرع والسقي
الاسطوانات
جي المسجل والاسطوانات *وهاتوا لخبار ياهدرازات *قالوا عيب قالوا احرام * مايصح للي عنده بنات *واللي عنده البنات عنده الهمَ بالحفنات *واللي يشري الاول القرمة عليه *الواه شاريه ؟ شن عنده بيدير بيه ؟ ؤعنده اشباب واصبايا *واسترنا يامولايا*وطهقوا به الموراهقين والموراهقات وهاته يا اغاني ام كلثوم .وفريد الاطرش .وعبد الحليم .وبو عبعاب .ونجمة الطرابلسية وفهد بلان اخدوا غرضهم ؤغايتهم فيه ؤباب انفتح باب اتسكر
واطور واصبح منظومة ؤقالت الغناية
لانبي حفلة لاعزومة ** راسيي اتصدع من المنظومة
ؤبعدين شن صار *موجود في كل دار
التلفاز
ؤبره يازمان اتعالى يازمان * بره بره بره جي اختراع *بعد ماسموا الراديو مذياع * فيه اللي عارض وفيه اللي قال ممتاز* هل الاختراع اللي اسمه التلفاز
والمحطة اسمها الملاحة *واللي اشري لول القرمة عليه *والزحمة عنده’ الصغار والنساوين ؤبعدين ابدت الناس اتبع في بعضها زي السلسلة
وحتى هو قالوا =عيب وحرام *اتشوف العيلة الصور القدام *اللطف ياربي اتقول غاسلين ؤجوهم في وادي مجردة ’استرنا واستر اضنانا يامولانا ’ هي التصويرة في الحوش احرام’ بعناك صندوق اكبير يرقصوا فيه الشياطين * والله والله قال الشيخ ’الحوش اللي اخشه التلفزيون *محال اتخشه الملائكة *
وين قالوا ابنادم طق القمر *كل واحد بيتاكد من الخبر *البنات جبروا اباتهم واشروه *لموا اقروشهم مع امهم ؤجابوه *هذه باعت مجارة اسطنبولية * ولخرى عبيء وفراشية *واللي نقرت الفلفل والطماطم * فيه اللي قعد سبعة ايام *لارقد لانام *
ايصلي ويسبح* المولى اربح * وقولة الله ياسمي* صبي المي *المسخ جي *واحني يارب *مانا امعاهم *هذا شيء
صنعوه الكفار ياستار
ياسويدي الهدار
كان ماينزل اعلينا لحجار
هذا كله من
اولاد عيسى* واولاد موسى
منهم غادي *قطاع الوادي
اما اولاد سيدنا محمد حاشاهم ابدا مايركبوش القمر
هذوا الكفر
وبعدها شن صار * ماحد محتار *والتلفزيون في كل دار
الفيديو
الفيديو قعد موضة *وسلعة في لسواق معروضة *وعلي المنشآت زحمة* ودعاك مافيه رحمة *الدنيا طوابير كبير وصغير * وفيه اللي على خاطره غادي بات * اوكان ماجابه لايقبلوه اولاد لابنات *وحتى هو = قالوا احرام ؤعيب * وفقر للجيب *واتحسنت بين الناس العلاقات * خصوصا ها المدرسات*وانقسموامجموعات *هذه مجموعة الصوني =وهذه مجموعة الجيفيسي .الحكاية حكاية تبادل شرطان .مابين الابلات والجيران ’ ومنها بدت المصلحة فوق كل اعتبار * وانتي مرات مارة تسمعي ياوليدي برة لفلانة قوللها قاتلك امي اعطيني شريط ...كذا
ؤبره يازمان اتعالى يازمان وقعدت الشرطان الغالية ارخيسة *ؤمعاش اتعدل المزاج ابخيسة *وفيه اللي من الخارج جاب *ميات شريط مع الالعاب *غير باش يفرحوا الصغار * ايطوقوا شن جاب * ؤقولي شن صار *اتغير الراي بعدين *وقعدت الشرطان تتلاوح في التراكين .
الصوني امعاه التوشيبا **والفيديوا ماهوش غريبة
واللي عند ه في جيبه * بنقوله ياحبيبة *اكمل عليه يأخد الجيفيسي
بره يازمان اتعالى يازمان *بدل فيديو واحدَ اتنين وثلاثة في كل حوش *على حسب الحالة والقروش *وكرهت ؤملت الناس *من الضجيج ونفخ الراس ؤماعاد حدَ يتفرج
وشن مازال ياصغاري **بنخبر علي لتاري **وحتى هو قالوا اعليه عيب وحرام *مايصح اتخلي الصغار مع لتاري يذهب شيرتهم وينسيهم في اقرايتهم *واللي اشري لصغاره *جوه الصغار من كل حدب وصوب * كل يوم زحمة داره ’ وعادي تسمعي اللي ماحصل العنب قال قارص ’والممنوع مرغوب ’ يتفرجواوهرجوا لين جبروا اباتهم واماتهم واشرولهم
بلي استيشن
بعد ماطاح سعد الاتاري ,جي البلي استيشن العالم يصنع وحني نشروا ؤنستهلكوانلبسوا نلعبوا وهذا طبعا خاص بالالعاب القوية كمل اول اصدار ,والاصدار الثاني, وتوه ؤصل في الاصدار الثالث هما قالوا العاب للصغار, لكن اني شفت بالعكس الكبار يلعبوا به
وقداش من اللعب مانعرفش
اصبح اللعب هدف
ماعادش وسيلة للتسلية
الستالايت
وتوه جي عمك المربح الستالايت *وسمعوا الناس بيه* وكل واحد اتمنى يشريه *في كل هدرزة تسمعي كان من ايقول *موش معقول *فلان بهلول والا سكران *جاب صحن بلفين دينار *
وفيه اللي جابه من بره ***كل واحد يعمل مايسره
يامولاي زيد اهناي **بعد الشاشة * زاداسقاي
يازعمة البارح شن شاف**الشبح اشراه بثلث آلاف
واللي ماشري متخلف واللي اشري فري
ومازالت كلمة عيب وحرام و اخطار ** يتفرجوا علي ها القنوات الصغار
وبدت المرأة اتهدد في الراجل
في الخشة والطلعة
خود الشيك ؤجيبلنا ***صحن كبير امقابلنا
ؤقالت
ياراجل والله ماك فايت ***لين اتجيب الستالايت
والله مانطيب اغداي ** لين انشوف الصحن احداي
جارتنا جابلها اليوم**صحن ايقابل في النجوم
ياسلم زوله يامناي * زاد اسقاي * عل الشاشة عاشم في ارضاي
ياسلم زول غويلينا ** اراضي فينا **شبح كبير ؤجابه لينا
ؤجاب الراجل الصحن * ؤشافت المرأة بعده المحن
واطمنوا=
شفروا بعض القنوات على الصغار**والمصيبة انضربوا الكبار
وقال الشاعر
بعت الجمل واشريت ساتالايت **وبقيت في شبح النصارى زايط
بعت الجمل والبقرة *نبي انشوف احداي وحدة شقرة *يزي علي قلبي الهمَ ؤكدره
*خلي نزهى اشوي ننسى الفايت
المهم طهقوا به مدة *وهذا شيء واتعده
وعشقوه الشيابين **وبدوا اقارنوا بين لثنين
بين اللي احداه النية المطيعة **وبين اللي في احسن تقليعة *
وفيه اللي قال
والله لولا اللي في الشاشة **مانقعد بحدى المكشاشة
وردت المراة
كنت الزينة كنت الباشة **بعد الشاشة ** صحيت اطلعت المكشاشة
رد الراجل
اتشيري اعلياَ**ؤماعاد درتي قيمة لياَ**الصحن اشريته خاص بياَ**وبنتفرج زي ولد الباشة**
اني اللي دافعها المالية **ؤماحد ش عاطيني امعاشه
ردت عليه
انكش علي اصغاري * نجيلي زولهم ياباري **الناس تنجح تقرا ويتماري ** ولاجندي مزهود امعاشه**
اتجي خدمتهم بالدولاري **موش نصب وحيلة وجياشة
ورد
اعلاش تتشكي * اتنقي على راسي ؤتتبكي *كان القيتيني متكي * اتقوم قيامة اعشق افراشه * شوفي الزينة تعرف تحكي * لابسمة عندك لا بشاشة
ردت
قول من جهلني * ومن نعمة لعلوم احرمنني * نجي زولك بتعيرني * اقعدنا زي ايهود افلاشة
خايب مرسالك واصلني * وحرقتني في قلبي طقاشة
واللي ناوي بحطمني *يحلم في نومه وافراشه *
سلم بنتي بتعلمني * ونتلاقو ا تحت المشماشة
والشيابين اسلامتهم ’بدل مابفكروا في زواج اولادهم ’ابدوا افكروا في روحهم’والشباب بدل مايطور من نفسه واسرته’ واخلي عنده اهداف قيمة ’يساعد ولده يصبح عالم اوبنته مثلا لا اشوفوا للسلبيات فقط مسلسل الضرة مسلسل
الحاج متولي ’ ومايعرفوش شن اوراه من اهداف خبيثة ’في اخيار حرب افغا نستان عرضوا المسلسل
ولما مانفعتش المسلسلات الإباحية المدبلجة اطوعت تركيا بعرض مسلسلات غايتها معروفة ونيتها مكشوفة
ويستر الله
ومن هذه المسلسلات والافلام وعرض العنف والعري الهم جي
وعرفوا امسارب الارنب واتعلموا الغش والتزوير وكيف ابنادم يركب ويصير
ولوكان على حساب البلاد والعباد
النقال’
وبره يازمان اتعلى يازمان بره بره اياه هذا مانقدروش اعليه *بخمسة الالف دينار من شركة المدار
كان الغني والا اللي اعطاته الحكومة **مبرك يومه * ضاوين انجومه
وارخس النقال **وبدينا في القيل والقال **وجي مسلسل احرام ؤعيب **البنات اديروا نقال **الاولاد موش لازمهم ’*وتغيرت النظرة سبحان الله *البنت هي اللي لازمها *كان عطل عليها وهي في المدرسة والا الجامعة كيف بتتصرف ؟ لا لازم منه الولد علي كيفه يأخد حتى افيكو..ولا تاكسي
والناس اقريب تهبل بالاختراع الجديد ,ادور من مكان لمكان وين فيه تغطية
الدنيا فارحة ؤجاحدة , وفي حنين الصقع والليالي تلقي مجموعة راكبة على راس الجبل , تنشدي
ياربي شن فيه , زحمة ان شاء الله خير
ايردوا عليك ايدوروا في التغطية
يعني ناقصة كان غطوا الرجلين *الراس عريان *ؤكان غطوا الراس الرجلين عريانين
وبدت الناس اتفصل وتخيط في الدوه
ؤقال المهندس الفلاني ممنوع على لطفال **ادمر الخلايا النقال
والقناة الفلانية قالت ؤقالت
وقفة
ياوالله انهار املح ’هذه الثالث خطبة نسمع بيها ؤمايصيرش منها
اعلاش مايصيرش؟ من همَ النقال
من كثرت القيل والقال * يادوبه شهرين اطوال * رد ابيانه ؤبركوسة * واللي عنده زايد مال *محتل الساحة بفلوسه *
خبرنا ياجبل انفوسة ** العالم بوحدها ادروسه
وطلع المسج القصير **قوي التعبير
هذه مسجات عيد ميلاد **وهذه مسجات اعياد **وهذه اغاني خفيفة **وهذه لقطات خفيفة
والناس ابدعت علي قد ماتقدر
كل واحد على قد جهده
وين سكتوا الشيباني اشروله نقال والعجوز وعلموها بالأرقام كيف تتصل سكتوا معاش احرام لاعيب ولاعاد ينصحوا في ولد لاعاد بنت ’واصبحت عندهم الامبالاة
واصبح النقال امر واقع ولاحد يتكلم عليه
الحاسوب والنيت
ماطولش الحال**اتخلط حاسوب ونقال * وجي اختراع اجديد **للبشر ايفيد *ؤمعروف بالأكيد اسمه النيت
وهذا آخر اختراع وصل ودارت دوشة القنوات *علي خطورة هذه الاختراعات *على الاولاد ؤعيب وحرام **وخصوصي في الظلام ’ وخش النيت غصب علي يبي واللي ما يبي * لأن الدولة فتحت معاهد ليه ,ؤكل طالب لازم يشري جهازه ويتعلمه , اوماتسمع كان من يقول الاولاد يمشوا للنيت وياستار استر عليهم ورد بالك ياولدي تفتح موقع ممنوع رد بالك ===احرام ؤعيب واللي يتكلم في السياسة * خطر على راسه , واياك ياولدي من السخط , ؤجي النيت ؤخش كل حوش كان اقليل ؤماقل’ وتعلموا الصغار قبل الكبار ونقلبت الآية وبدي التحكم والسيطرة في ايديهم ’ وعرفت المراة كان عندها البرة غاليها **وتكلم فيه *ايه ياولدي هذا اختراع امليح فوق الريح
واعرف قصة النيت الشيباني **وخصوصي الاتصال المجاني **انه بفيده *ؤمافيش داعي للجريدة ’وتغيرت الأجهزة وتنوعت ,واصبح خفيف وحجمه صغيروتقدر ترفعه وين ماتبي ,ولت ليه اهمية كبيرة ,واللي يفسد اجيبوا غيره هذا لاب توب .... وهوا العزيز الغالي , والبنت اللي تعرف النيت في الحوش عندها مركز كبير ؤمنزلة عالية عند أمها ؤ بوها والصغار ايحبوها * هي اللي تأخد بخاطرهم وتفتحلهم النيت لمعرفة لخبار* وشن فيه وشن صار * وتلاعب في الصغارؤتأخد بخاطرهم ,واصبح فيه تمايز وهذه صفة جديدة خشت الحوش ’لأ نه نسبة كبيرة جدا مايعرفوش يفتحوه حتى المتعلمين ولا يندروا عللي صايرفي عالم النيت زي ازمة حجب
اليوتيوب توه *وهذه نهاية الدوه
موش فارقة عندهم
ولا ايفرقوا بين قوقل لاياهو لايوتيوب ..........
والتويتر والفيس بوك اتعلموه الاولاد والبنات من بعضهم
يعني الازمة اتخص اللي يفتحوا في النيت فقط ’اما البقية الباقية من اميين النيت ماعندهمش علاقة افتح والا سكر.
وهني الخطاء ... لأنه كان من المفروض ان تردوا اجميلهم وتعلموهم .ويصبح الشعب كله واعي ودارك لان الكبار كنز خبرة لايستهان به .وحرية التعبير مطلب الجميع ولكن للحرية حدود’ ماهيش فوضى , تنتهي حريتك عندما تبدأ حرية الآخرين .
والشيء الثاني اللي ينعرض لغرض التشويش وصور الخلاعة والفضايح هذا في العرف الليبي قبل حتى الاسلام اسمه = مسخ = والواحد يجب ان يترفع عن الاوساخ والمستوى الهابط ’ ويصفي نيته مع الله والناس .ويتكلم ويطالب بحقه بطريقة شريفة وقوية َ وكلام الحق وجاع احني المواطنين ادفعنا دم قلبنا لشركة الاتصالات َفي مقابل خدمات , وايل ماكس اذا هي المسؤلة عن هذا الحجب
وهذه الازمة ستخلق مبدعين جدد في فن الاتصالات ’ الألم يولد الإبداع ’والمحك يصنع الرجال ,شدة وتزول *
وعدل في القول
وكل سفرة اتعلمك احداقة
وكل اجديد وليه طهقة
وازمة وتفوت *ولاحدَ بيموت
وموجة وتعدي **والبحر اهدي
والله يهدي لعباد **في صالح البلاد
وسيوره يقعد خراف
وهذا منولوج بالمناسبة وان شاء الله يعجبكم ويطيب خاطركم
تويتر
خبر ياتويتر ياحر **ؤقول السر **اعلاش انضر **اليوتيوب اعلينا امسكر
خبر ياتويتر ؤميل **على كتفي قول بالتفصيل
أول مرسول **ترا خبر دلل في القول **خيره اليوتيب مقفول **ؤهاته امثبت بالدليل **ماضني واحد مسؤل
ادير اسوايا و اتبرويل
خلينا اصحاب** ؤقلي من شمع لبواب **ؤلبس لليوتيوب حجاب **وخميَرعل الوجه اكحيل **إسلامي ولا مرتاب **والا باور وزناكيل
زقزق شن صار **وقلي من هوا الحزار **لبس لليو تيوب اخمار **ؤماعاد يطلع صبح ؤ ليل **لازم من جنس الكفار **والا صهيوني وعميل
افرحنا وطمعنا **بعد حزنا مسافة وارتعنا **ضقنا الحرية وأرجعنا **للتخلف الف ميل **ياريته عاقل يسمعنا *
ويفهم انه مستحيل **آه ياماضي واقعنا **يضوي كيف اظلام الليل
خبر ياتويترؤميل ** ؤجيب اخبرهم بالتفصيل
وثم الفلاش باك **ؤدوم اهناي اهناك
