قصيدة دعوة للسعادة مسموعة

قصيدة ماعليك ملام مسموعة

اضحى مبارك

للي عارف روحه

ماعليك املام
املامي علي نفسي
ارقيق اعزام
ؤثقت فيك
ؤدرت بيك احزام
اتريتك امهبرد
ماعليك املام

ماعليك انلوم
انلوم
علي نفسي اللي كاتوم
ماشكيت منك يوم
صدقت فيك الخير انترت انجوم
ؤغصن زيتونة عليه احمام

ما عليك لومة
اللومة عليَ تبعت ها المنظومة
تاريتها قدومة
الثقة اللي ولت عليَ امشومة
وانك اقناع بس للاسلام
ما عليك املام

ما عليك لمت
لمت علي نفسي ارضخت
انهرت
صغرتني ؤكبرت
استعليت وستعلبت وتمكرت
وعضيتني وعفستني في زحام
ما عليك املام
سيرك امهبرد
مايجيش احزام
صدمة قوية اتفجرت بالغام

مسجات معايدة ليبية صرف

خيارات الرسائل

عيد سعيد وكل عام والجميع بخير

يانا ياكاثر تعويجي ** انسولف ونراسل خاليجي

بعد ماوصلتني عدة مسجات من الا خوات اشكرهم عليها ولكن في نظري كانت افضل لو كانت بلهجتنا ولو كلمة( مبروك عيدك )

اثاترت ودارت الافكار في راسي , واسرعت والوقت ( ازرب ) ليلة الموسم واني نستعد وانجهز في روحي للعيد في للجبل ,

العيد في الجبل

عيد الهني واعسل

اعليك الاحباب اطل

اتعيَد وتهدرز وتدلل

مفتوحة الحياش اكل

كلا طرابلس في العيد فاضية

في هده الليلة سهرت على كتابة هده المسجات آملة ان تنال اعجابكم وكل عام والجميع

بخير--اغلب هده المسجات تعبرعن منطقة (الجبل الغربي) وآمانيهم

في طرابلس احياش الحباب ابعيده * وياسعد من في الجبل عيد عيده

***

عيد وبروق

ورخ المطر مطلوق

وعزيز ايزهي الخلوق

وارفع ايديك الفوق

وقول ياخالق المخلوق

عند الشروق

يوم العيد

اعلينا سعيد

ان شاء الله

***

عيد ياعذب لحساس

يا اغلى من كل الناس

ومطر يعقبه ترفاس

وادعي امعاي

وربي يتقبل ادعاي

وكل عام وانتم بخير

***

عيد ورعد

وينهض السعد

ويتحقق الوعد

وينتهي الفراق والبعد

وتزهى ايامك

ومبروك عامك

***

عيد وبشاير سعاده

ورخ المطر بلا حداده

وترفاس الحماده

والخير في ازياده

وحجة واعباده

ربي يعطيك

وينجيك

***

عيد وديان

اتجر جران

ولاحد زعلان

القلب يطمان

ويزداد لحنان

واجمل اربيع

وانده يابديع

والف مبروك

***

عيد وسحاب وضبابه

وها العام صابة

وربيع وزرادي الغابة

والصاحب مع اصحابه

والاهل في هني واطرابة

لاشَر ولاكدَر

هدا العام وكل عام

*******

ها العيد سبعة امباريك

ويفتح الله بابه ويغنيك

الوشق انلود اعليك

ويحميك وينجيك

يا سيد الكلَ

اكلامك اعسل

وعيدك فل الفل

***

مسجات معايدة ليبية

لكل صايم ؤصائمة

سعادة دائمة

ؤخيرات عائمة

ؤفي حب الله هائمة

وحمامة السلام اترفرف حائمة

وكل عام والجميع بخير

***

يابجاه عيد السني

والصوم والعباده

يجعل عامك هني

وعمرة وحجة زيادة

وتنال من الولدين الرضي

وتعيش في سعادة

وكل عيد وانت سعيد

***

يابجاه عيد ها العام

السعد ينقام

اولي تمام التمام

وبعد ها العيد

زكار واعبيد

والخير ازيد

وافراح قايمة

***

تهاليل وبشاير

والوجه ناير

واللي تبيه في خاطرك صاير

وعيد سعيد وايام زاهية

***

عيد وقلوب

وفي البخت محسوب

وفي القسم مكتوب

اسمك بحروف الذهب

سعدك جلب

فرحة العيد

وحنة واعبيد

وزغاريت عالية

وكل عام بخير

***

يازايد دلالك

يتقبل الله صومك واعمالك

ويعطيك ما في بالك

واللي اتريد وعيدك سعيد

***

دزيت مرسالي ليك

باقة ورد اتفوح عليك

وتقولك نجيك

وكل عام وانت بخير

***

يامسج قلبي سلم علي الغالين

اقراب وبعيدين

وقوللهم عايدين فايزين

وكل عام وانتم بخير

***

يامسج الروح اعليه سلم

وبالعبرة تكلم

وفهمه ها العيد نتالم

وشوفته هي العيد

***

دزيت مرسالي ابوح

لي روح الروح

بعنبر افوح

اقوله كل عام وانت بخير

***

كل عام وانت ياوديد

متهني وسعيد

والخير ازيد وامك زاهية

***

يازايد غلي

ياجلاب الزهي

ياجنان الهني

اجعنه عيدك ابدي

بلسعاد من السمي

وافراح في الارض **** وتكمل السنة والفرض

***

يامن في غلاه وداد

ينشد اعلينا ساد

حتى الديار ابعاد

القلوب عند بعضها

وكل عام وانتم بخير

***

عيد وانوار

وافراح الصغار

وحج واسفار

وتسابيح واذكار

ونقولك مبروك عيدك

***

عيد وامطار

وربيع وازهار

ونجاح الصغار

وطقة الزكار

في حوشكم

وتنزاد اقروشكم

في ها العيد

وكل عيد

***

اعياد وسرور

ورد وزهور

والكعبة اتزور

والذنب مغفور

وفي الحظ مذكور

واللي تتمناه ان شاالله

***

عيد وبشاير الخير

وخريف بدري اغزير

وربيعنا انواوير

قولوا امعاي ياقادير

وكل عام وانتم بخير

***

عيد وشبوب

وغفران الذنوب

ومحبة صادقة في القلوب

وشوفة المحبوب

ونصرة المغلوب

هي العيد **عليكم سعيد

***

عيد وامطر

وديان اتجر

وقلوب تنسر

بشوفتكم

وشوفة الارض راوية

***

عيد واسحاب

للمطر جلاب

ولمة الاحباب

وريحة سخاب

للغالين وادعوا امعاي آمين

***

عيد وامطر اتصب

وديان اتقب

وطلة من انحب

في ها العيد

هو العيد

***

دزيتلك مرسال

اسخاب وعود

ودعيت ياكريم الجود

اتبلغه المقصود

واللي يبيه موجود

وعيدك امبارك

***

دزيتلك مرسال

عطر وعنبر افوَح

بالعيد اهني الغزال

ويحضنه ويروَح

وعيد سعيد

***

دزيتلك ثلاث باقات

دعاوي مسك ابخاوير

الاولى في صحتك وزهاك

والتانية اللي تبيه اصير

والثالثة في عرفة نلقاك

ويدينا الفوق ياقادير

***

عيد سعيد

وثلاث امصابيح اتقيد

الاول من العاماء

التاني من العظماء

الثالتة من النجباء

وربي يسعدك بيهم

وتعيشي وتربيهم

ودامت اعيادكم

***

والله مانجحد غلاك *** وماننكره يا الغالي

ولولا الغلي ماحرت ***ولابعتلك مرسالي

وكل عام والجميع بخير

بنغازي

سلم رباية الدايح  .........اللي طلعت منهم أدباء وشعراء وكتاب ومفكرين وفنانين ............الخ ياريت كل المدن زيها

 

اتمنيت نلقى اعزاز*** ويازينهم من اعزازي

في ميعاد حلو هدراز ***واخيارها بنغازي

منين كنا وكانت لايام** حلوة اتعدت ياسلام

في بنغازي

كنا في بنغازي* وكانوا ليَا فيها اعزازي
والله لانغير لانوازي* كان اقريبة اعليها امقام
ربي ايكافيها ويجازي* يعم َاعليها الخير اجمام


الخير اعمَ** فيها وفيا وفلي ابصم
نستاهل مولاي تم* غريبة وعززني بمقام
فضايل ندكر مانعتم* ليكم مني الف سلام

الف تحية** وقصيده خودوها اهدية
مدارس البركة جملية* الحميضة وطارق بنسام
وكل من وقع مر اعلياَ* واسمه في سجل الدوام

عشناها اعجيبة** وعندي فيها مية احبيبة
بالك اكثر لاما انجيبه* كلهم حب اطيور اغرام
غوالي واغلاهم واسريبه* اليا خطر اتقول صور افلام

زهاوي واطرب** سنين عشتك غادي واكتب
الدنيا اقلوب الدنيا حب* مشروحة اترفرف بسلام
منابع ودَ وحن اصب* في حبك ماعلياش املام

الف ونزيد** تحية في اسطور القصيد
لكل تلميدة وتلميد* ازهار وتغريدات انغام
وجوه منشرحة اتقولش* عيد ولاطواف مكة في ازحام

اليا اخطر اسريب** انهاتي صور الماضي انجيب
بلباهي نذكر لحبيب* جويراتي اطويرات احمام

عسل نحلي امدوب تدويب* ذوق وعشرتهم بغرام

مغرومة بيهم** روح روحي نذكر طاريهم
لا غيبة لاقرضة فيهم* قدامك كان فيه اكلام
قلوب اكبيرة الله عاطيهم* ايقيموا القدر اجواد اكرام

افراح و اللمات** وعراس اعزومة وسهرات
وياما امشينا من رحلات* بحورة والخيرات اعرام
زهاوي تفرجن عل الغمات* وهذا تقريري بختام

محلى عشرتهم** واطربهم زاده بصارتهم
لوكان امضرة لحقتهم* صنديدات اقوا واعزام
تلقاهم كتلة جملتهم* راي واحد مافيه افصام

لك مني مليون سلام** يا بنغازي عنك لكلام

فوح يا نوار زماني

نشر الرسالة

فوح َيانوار ازماني

فوحَ يانوار ازماني* واحلومة رجعتلي تاني

فوح َ فوحَ* علي حبي كان امطوح َ
سنين عمري اعليه انوح* َ ونيرانه تشعل دخلاني
يطوف اخيالي ويسوحَ* وطيفك ساكن في وجداني

فوح َ يانوار ازماني

فوحّ يانوار *علي اعزيز عالي لقدار
كان اغلى كان احسن جار* شافه في هالكون ازماني
يااحلى صورة وتدكار* مابين احبابي وخلاني

فوح َ يانوار ازماني

كان عزَ اعزيز* ايام كنا وكان صغر الميز
ياما سهارى وتهدريز* يدكرها بالشهد الساني
ولو درنا فرز وتفريز* اغلاك والله جوهر حقاني

فوح َيانوار ازماني

اغلاك افوووح* ومسجك هلي ردَ الروح
اقعدت انخبر بيه انبوح* كل من شفته ؤلاقاني

قليبي دوم ليكم مفتوح* ونتمنى انشوفك من تاني

فوح َ يانوار ازماني

===========

الى الحبيبة الغاليةحليمة الدراجي وزوجها الفاضل الدكتور محمد سليمان كل مامرت بي ذكري ولادة ابنتي نجلاء تذكرت حضورك وفرحتي بك لاتوصف وانتابني شعور بالراحة غير عادي وتسلم ايديك علي الكسكسي بالنعناع المصراتي

مسجات وتناهيد ليبيات
اهتفت للسعد ناديت
ودزيتله مسجاتي
قالي اتهني اني جيت
والليلة عندك امباتي

دزيت للسعد امراسيل
اعليه الفوا ايعولوا
وغنيتله فيك امواويل
قالي انوفوا انطولوا

دزيتلك اتهاني القلب
من رقته ومن الحراير
يارب نجي العزيز
واحفضه من الخساير


دزيت للسعد مرسال
وغلاي ومسجاتي
ورافقت عنوان بيتك
قالي عنده امباتي

انت ودك يازين
اعليا اتماطر ادلايل
ياالله انشوفك بالعين
وتجيك بنت الاصايل


اندهت للحظ يلفاك
يخطم احفك اشوية
قيَس اعلياََ اغلاك
قال مية \ المية
لفوك بالحرير
واسمك احروفه ذهوبة
تخطيت جسر المشاهير
وقالوا الثامن اعجوبة


اندهت للسعد اجي
قالي اتباشير جيتك
سلته بالله القدير
اضوي شمعات بيتك

مسجد امنا حواء

هدي القصيدة اتمنيت ان اتكون اول قصيدة في مدونتي ,ولكن ماسخرش ربي وفيها خيرة, والشي التاني اتمنيت سميتها بأمنا حواء ,نسبة لمسجد عتيق امام بيتي في الجبل ,وكل وين بنشرب قهوتي فوق البلكونة والاخاطمة علي هدا المسجد ,نلقى روحي نتمتم بكلمات,الله يرحمها ويرحم كل الباهيات , وادورفي راسي افكار منها معظم افكار هده القصيده ,---وحاولت في السنوات الاخيرة نقرأ اعليها ,ولكن للاسف مالقيت وقت- لامصادر- واغلب معلوماتي من الذاكرة الجماعية , كان هدا المسجد اسمه مسجد سته اصيام ؤمافيش داعي نحكيلكم اعلاش سموه,خاليها مرة تانية, والاساطيربتقول مبني علي انقاض كنيسة قديمة,في الفترة اللي كانت فيها مدينة يفرن قائمة ,وكان اسمها امرسلون--, اما عن شخصيتها ماعنديش معلومات اللهم انها لها علاقة بامرسلون في الرحيبات حيث اسست اول مدرسة للبنات هناك ,  في امسين المهم من شطحات خيالي واني نشرب في اقهيوتي طبعا في البلكونة وماتستغربوش ,لان الجلوس قدام البيت عندنا عادي لاننا اقارب في قريتنا ,المهم كونتلها شخصية رائعة ,امرأةعندها تصورات ايجابية مع كل من تتعامل امعاه وعندها قدرة موش عاديةعلي استحضارها في دهنها ديمة ديمة وهدا طبعا وبدون شك اثرعلي نظرتها للناس ونظرة الناس ليها,ولازم تفكيرها صح صح وجميل واهتمامها بتهديب باطنها وصفاء النية وصدق المشاعر, وحب الاخرين, والتعمق في فهم الامور وعندها نظرة ايجابية وماتقيس نفسها بالاخرين ومن الخارج تلبس في اعبي بيضة اثلج لجان في الصيف وفي الشتي اعبي شخمة امخططة,ولاذهب لافضة بالكثير خرص الوجه ,ومغزل الجداد ديمة في ايدها, ومعزتها امعاها ,هدا اللي خلى عندها شخصية اقوية احبوها الجميع ووتقوا في قولها وعملها وربما علمها , وهي وتقت فيهم فادارت شي موش عادي --- شنوهو هدا الشي ؟ الله اعلم- والشاهد انه اكبر اكبير البلاد يسجد داخل مسجدها -واني كونتلها شخصية وانحاول انقلد فيها ,وانتم تقدروا اتقلدوها؟ ان شاءالله

بسم الله

بسم الله اول كلماتي

الثاني انصلوا علي المختار
والثالت عبير تحياتي

للي فتح تدويني زار

آنستوني ياحبيباتي

قبله يمين وقبله يسار
وتقديري واحتراماتي

لو زاروه من الشعار
وبوسه بوسه لحفيداتي

هيا ناخدكم بغمار
سجل واتفضل باقاتي

باقه باقه من لشعار
فل وياسمين قصيداتي

مع انسايم تغبق وانوار
والورد الجوري احكياتي

ولقرنفل جزل السمار
ومسك الليل طرَب مسجاتي

وبراعم اهزيزاوتار
تتناغم مع لون احياتـي

وتتنافر مع الزمن احتار
ان شاء الله ماتخني كلماتي

تعبر عني وعن لفكار
عن واقع عشته عن ذاتي

عن جملة الناس الحضار
علي بلادي مدني قرياتي

علي العالم ارفيقة اسفار
من تاريخ امي ؤجداتي

لاتعرف قلم ولاحبار
علي الدنيا الماضي والآتي

نتايج للي فات ؤصار
ياصبري ياايماآتي

بحر غارق ماليش اقرار
علي ضوالي ظلماتي

وعلي طفى~منها انوار
علي طولي ضفراتي

واللي قصقص منها اشبار
صعودي وركوبي قماتي

عوامل شدتني في اغوار
علي لملم ليا اشتاتي

علي حاربونا بالنار

يرحم من جمع ورقاتي

وين عدموا ملفي بقرار
عللي اجبرني لزوم اسكاتي

واللي علا صوتي اجهار
علي شمعة في احتيمالاتي

بالك تضوي اغدت اقمار
علي زحمة اطياف اخيالاتي

وياما عددها الصوار
علي متر زدته فـ مشياتي

عثرت التالي ميل امتار
علي ساندني في اتباتي

واللي اعقفني لاخ ؤدار
علي امرار اعذاب لوعاتي

ومن بره زينه وافخار
سموها صدره في عاداتي

بهرج علي الفاضي بشمار
علي كبلها ايدياتي

وسموهم زوجين اصوار
واحد يدفنها رغباتي

وبالتاني طموحي ينهار
ؤخلخال اخلخل قدراتي

ؤيغير وجه المسار
وخناق يخنق عبراتي

بالك تسمعها لحرار
واتغير كل احساباتي

وحساب اللي اقرالي وثأر
ياجواهر في موروثاتي

اغبت وين قعدت اثار
فرزت احجيرة بمحولاتي

وياما من لولو واحجار

حاول وافهم اشاراتي

ؤفيه ميات من الشطار
اقدمها للجيل الاتي

عمل قيَم فني تذكار
التخلف مانع نهضاتي

ورق رابح فيد السمسار
والجهل اسبايب معاناتي

عشت الدنيا اعفاراكيار
وديمه انزنزن ياوخياتي

وهدا عرضني لخطار
الله اسددلي خطواتي

انحقق هدفي في المشوار
نحمد ربي الوقت امواتي

مع النيت انواصل بازرار
قدامي كل امحطاتي

لاتاشيره لامطار

ونزود في معلوماتي

انقي شن نبي نختار
ويسعدني انعزَز قدراتي

بتشجيعكم وعزومي اكبار
ؤمتيناني لزوجي ؤصحباتي

ؤخوي ؤخوه واهل الدار
ونخص اصغر بناتي

لولاها هدا ماصار
انحاول بالمجهود الذاتي

اني موجوده في قعر الدار
ويا ليبيا لك زغروتاتي

مع  تحيات جمعونة مادي الشقروني              اخدت هذه الصورة من منتدى يفرن

تكملة لقصيدة بنرقى الجبل

تكملة قصيدة بنرقى الجبل

راني قلقانة
ولدك مايهني في امتحانه
وبنتك جتنا هالايام حرجانة
انخاف يعلقوا ويقصقصوا علي احوالي
وان شاالله اتولي انكون مطمانة
نركب امعاك والصغار التالي

ديما وانتي قلقانه
والحوش سجن امزينة سيسانه
مغموم علي صدري اتقول زنزانة
اتنقرش بارقانزا سوم غالي
اولاد الخشايش والغوابي رانا
عيشة اجبلنا عزتي ودلالي

الحوش موش امكيف
موش قادرة يابوي فيه انصيف
البعوض ياسر والتراب نتعيف
طول الليل نكرب طيرهالي
حني حوشنا اهنايا صغير انظيف
رحيل الضواهر مايجي علي بالي


ارحيل الضواهر باهي
سلاطة وخبزة فرن زايد شاهي
الدنيا اتفحفح والخاطر زاهي
ولامن اضايقني انكدهالي
يارب يامولاي خود ابجاهي
نقضي اعقاب العمر في لجبالي


الحوش لبستوه ضاقو اخلوقي
وشغل المساند مص دم اعروقي
عاشق اسفرتح والهواوي فوقي

مع ريحة القندول والشعالي
يارب خضخضها ارعود ابروقي
اتجي قابة الوديان من لجبالي
تصبح اروابيها زهي مطلوقي
وترتع اغنامك امحادية لجمالي

الحوش بره بيعه
الضاهر جف ابداء في تقليعه
ارباية امدن ماني ليه ارديعة
لاعم عندي لاغادي اخوالي
سكر باب الجبل وامواضيعه
لاهو في برنامجي لاعمالي

منين اخديتك
ماانكرت اصلي من الجبل غشيتك
ولاقلتلك راني اعديم امالي
ونحساب روحي بالدلال ربيتك
اتريته مانافع فيك ادلالي

كنت اصغيره
واني اخديتك من اذهاب الشيرة
بنت النجامي والحوالي احصيرة
متخبلة في اقمجتي وسروالي
لافالحة في اشعير كيف انديره
ولانقد ابسيستكم ولاهي ؤكالي

القرموصس يامبنه
وياما ليناسك اهديتي منه
مكدسا لعنب اليوم دار الصنة
ولامن فيه الخير واعصرهالي
انسيتي روما وتركيا ياحنة
زمان كنت عندك العزيز الغالي
توةه الجبل انويت ليه ارحلنا
بعد التقاعد ناكره افضالي

البقلاوة بنينة
واللوز لاخضركسري وانسينا
اني انكرلك الخوخ والعوينة
وندفع للمنجي يقطفهالي
والثمر ابس ازري في اعرجينه
ولامن اولادك جي اودكرهالي

الليلة اعشي المرحومة
عمة راجل جارتي مريومه
ولدك اعبوده اليوم ناوي اعزومه
اؤقالي من الصبح يمه اتعالي
وتعرف الدنيا امقشعة ؤمقيومه
ؤطامعة في عامل البنهالي
وان شاالله اتكون حوستي مضمومه
انسايرك يابو العيال الغالي

الدكار غالي اشرينه ؤناقص
في سوق الثلاث مالقيته
في الرابطة اني صاحبي قال ريته
بنجري انلحق كان باعوهالي
والقرض اضهر بندور الخريطة
نعطيه لي سوري يبنيهالي


منك واولادك صرت في توريطة
ندفن اكراع تطلع اكراع التالي

بنديروا عرس اسمية
الصالة احجزنا ؤناوين سهريه
ابنجري انطق في باب الحرية
والذهب في الموشير والحوالي
هات الفلوس لبنات يشقوا بيا
زرب الوقت ؤماقضيت اشغالي
يوم العزومة امعاك من الصبحية
طريقك زينه ماتقول اتعالي

المدير فيا عيب
اسبوع والتاني اعليه نتغيب
هددني بالفصل والا انسيب
ولفت النضر بكري ابعتهالي
ناخد امعاشي والضمير انيب
امنغص اعليا الشك ماهو احلالي
ؤمانقدروا في اضرارالتسيب
واني عضوة امساهمة بهمالي
متحشمة والله وهو طيب
زودتها انحسه الزيت ارقالي

اتراه العني الشيطان تبعيني
غادي بلاد اهلي وامتعيني
البنات كبروا النوم جالي عيني
لامن اتقدم شافهم وادوالي
هزي امعاي بختهم ساعديني
بالك اجينا سعد عال العالي

وين تبي اجيهم
في اجبل متخلف ابترميهم
سكنة اجبلنا راه اصعيبة اعليهم
لايقدروا لشضاف لا الملالي
خل يقعدوا اعونس نشبح فيهم
ومايليق بمقامي ولا بيحالي

الي اهنايا غادي
هاالصحن لحرف في كل شعبة اوادي
والنيت والنقال في الايادي
وين الفرق اتراه وريهالي
وحياش ازهي للعين شي ْامقادي
واثاث من الخارج وكل اكمالي
وحتى كان مافيش شيْ عادي
والفايدة فلي وليد احلالي


الفايده في اخلاقه
اوليد اصل ماهواش من القاقة
كل الدويله خاتمة اوراقه
لايهمني في اغني لاظوالي
غير الهني وعيشة ازهي ورواقة
هدا اوليد نشريه حتى بمالي
ؤمانيش في هالكون طرف الحاقة
راني كيان كامل ولياَ امجالي

خاطري في ابحوره
ماخاطري في شبح الجبل انزوره
احجزنا دارين في تاجورا
والا في الثليل سبعة الليالي
الماتشوك قالوا رايعات اموره
ؤمصيف مصراته شكروهالي
الصيف يكمل والجبل سيوره
قاعد تابت كيف قبل اوتالي

التليل غالي ايجاره
الاثنين والخمسين جت ايساره
ؤمانيش ملي يغرفوا في الباره
قانون خمسطاش عرقل حاالي
وشط مصراته ابعيدة ادياره
اعلاش الجفي اتخافي اطبوا اعيالي
ياوين هالمتشوك حدَ ازواره
اليا اغرق عيل من اطلعهالي
لانعرفوا عومان لابحاره
تبقى فضيحة وعبر للاجيالي
اجبلنا ابلاش واسعات اضهاره
مراتع اجدودي مصيفي ومقالي
القصبة ارواح ؤزيد آت الحاره
القرموس عين وهدلولي ادوالي
وكل شي ْمتوفر بأقل اخساره
ؤنكره انبزعق علي الطواقه مالي
منه اتعلمنا الف والف والف ادباره
ولولا ادباره حرص مامشي حالي
والله ابارك في اشبك ازواره
عشنا وشفنا الحوت في لجبالي
بانيه قصر امشيدات ادواره
في صدري وهو عزتي وادلالي
بانيه برج امضويات انواره
بتخطي انخط نلهى نشقى ابحالي
بنرقى الجيل هيا امعاي اتعالي

بتوخري بندير مافي بالي

بين الحنايا العوج غلا منزالي

يكمل فرحي بيك ؤيحلالي

بنرقى الجبل

جماعة جبل نفوسة وخصوصاُ منطقة يفرن

ؤجيرانها يجبد فيهم الشوق والحنين لمناطقهم ؤمايصدقوا كان جت عطلة الاسبوع ولاعطلات لعياد والمناسبات الاجتماعية الا سيارتك والعلالي ,واكثر من يفرح ويشجع علي ركوب الجبل الصغار , ويكتر ركوب الراجل ونزوله لمَا يتقاعد ويلقى نفسه فاضي ماعنده ما ادير, اقابله ساس ارده ساس , العمل انتهي وصحبة العمل انتهت وعلاقته بالجيران رسميه,واغلبهم موش دايرين خطة ولابرنامج للتقاعد, ومن الزهق والقلق يركب سيارته , وينادي بنرقى الجبل هيا امعاي اتعالي, غابة اجدودي واسعة واعريضه , ورجعة امغرب شبه توه فريضة ,غادي امزارعه في الضاهر ؤزيتونه وجناناته واهله واصحابه اللي في نده , ايمد رجليه ويرتاح تبي اتبعه المرا اهلاُ وسهلاُ ماتبيش تبدا المشاكل والنقاش واحد يجبد التاني ارد,وكل واحد اشوف نفسه عنده الحق , وهده قصيده حواريه تبين مايحدت داخل الاسر من نقاش حول موضوع الجبل

بنرقى الجبل

بنرقى الجبل هيا معاى اتعالى

بتوخرى بندير مافى بالى
بنرقى الجبل هيا امعاى اتعالى

جانى التقاعد اتغيرت احوالى

مافى الخاطر
انخلى ادموعك على الخدود تتقاطر

اطوي الماضي واطرحي للناطر

فيه شي كان راقد وتوه اصحالي

والطير قال وكري اعليه انخاطر

انلحق اعقاب العمر هالي ابقالي

ياما اشقيت اعطيت حضي عاتر

عمري انهدر مانلت كل امالي

اتلفتى يا للا

لو افتالي الشرع بننزله

زغرتى ياللا

لو ظن فى راسى انقول اسم الله
انجيب نص من عمرك صغيرة فله

متمركزة بمعاش بى تفضالي
وماتطمعى منى اندز الغلة

انسى زمانى واطرحى موالى

تفضا بيا

انى اعريسها يالى ازهتى فيا
مستخسرة عاله وكاكاويه

شاهى المسكسك مااجى على بالي
مستخسره حتى الرغوة فيا

اتحركى بالعود تعطيهالى
راسك اكبر سخن بالذريه

اسلتى وجودى طارحة موالى

نطرحه موالك

بره خود ؤدير ما فى بالك
مانى غشيمه صابره على اعيالك

عذبتنى ياسر اتبهدل حالى
لكن الحوش والله مايهوالك

سلم البنته والصقورا اغوالى

يمه بري

والله يمكر فيك بتنظرى
وما اتحزمى بيا اولا تنغرى

رانى امسافر كان سخرهالي
تبقى اتعانى في الهموم اتجري

لاينفعك مازين لا بو هالى

ضغط ؤسكر

والحوش ليه مدة غادى امسكر
بنضفه ظهرى بيتكسر

لافيه خدمات لاعمالي
ؤبالك الفالح ولدنا يتفكر

يفزع بمرته اتجى اتنظفهالى

اتعالى ابروحك

انى فاد من الدوشه يزى اطروحك
ابعدى اعليا افروخ افروخك

وينك ياغلة قطفوهالي

شينك ارباية يابكاك ؤموحك

البوطى يومين فضوهالى

كيف بنخليها

بنتى جابت قول من هو بيها
ناس خاشه ناس طالعه اعليها

وتعرف راجلها عديم امالى
واللى اجى اقصقص على اماليها

ومايصير انخلى اصغارها شتوالي

اقعدتى ليهم داده

والراس حالف ما اعادى اوساده
احسن ازبونه امسجلة فى عياده

انى خاطرى اطبق وفرفق مالي
ومرضك دوم الدوم في ميعاده

وين مانقول هيا اطيحي التالي

يصفار وجهك تركبك رعاده

اتقول ماشية للحرب والاقتالي

ثلج صقيع

وبكرى خبر قالها المديع
وصقع الجبل اقطع تقطيع

درجة حراره صفر على الشمالى
وان شا الله ايواتوا ايام اربيع

نمشوا امعاك نزردو فى العالى

الزيتون قاعد سايب

ادرى عليه العين دمع اسكايب
لا امريض لا عاجز ولنى شايب

ولا انى من ها الوطن بكرى جالى
وما نا يا مرية ضنوة خايب

رانا اتريس والتريس اقلالى

الزيتون بره لمه

وتوه نرقى نغسله ونضمه
الليله سامحنى عندى لمه

بنمشى البنت اختى انزهى بالى
عيلة عيلتنا الكل ملتمه

بالله تربح ماطيرهالي

رانا اكسوبه

وماناش ملى رزقهم ياذوبه
جد جدنا عقب هاك الجوبه

جفارة احمادة شموخ من الاجبال
الله يرحمه ويغفر كل ادنوبه

على قد ماشبر الوطن الخالى

عندى حفله فى صاله

بنت عم خالة جارتى اللى اقبله
وفى الغدى ابنمشى من العواله

لحوش جارتنا هالى التالى
امبيته مازيغ واخته تاله

انوفى جميل ازمان ودوهالى
ويا مارغت من اشواهى عاله

فى عرسنا الاول وحتى التالى

اه يالولا الحماده

ما انلقطوا ترفاس فى ميعاده
انبيعوه باالدولار ياوداده

طيايير ترفع لدبى طوالى
ها العز ما القيناه فى حى اعراده

ولالاندلس لاقرجها الشمالى

مانا هلها نرقدوا على اوساده

انقاجى على قوتك وقوت اعيالي
يتبع