مسجد امنا حواء
هدي القصيدة اتمنيت ان اتكون اول قصيدة في مدونتي ,ولكن ماسخرش ربي وفيها خيرة, والشي التاني اتمنيت سميتها بأمنا حواء ,نسبة لمسجد عتيق امام بيتي في الجبل ,وكل وين بنشرب قهوتي فوق البلكونة والاخاطمة علي هدا المسجد ,نلقى روحي نتمتم بكلمات,الله يرحمها ويرحم كل الباهيات , وادورفي راسي افكار منها معظم افكار هده القصيده ,---وحاولت في السنوات الاخيرة نقرأ اعليها ,ولكن للاسف مالقيت وقت- لامصادر- واغلب معلوماتي من الذاكرة الجماعية , كان هدا المسجد اسمه مسجد سته اصيام ؤمافيش داعي نحكيلكم اعلاش سموه,خاليها مرة تانية, والاساطيربتقول مبني علي انقاض كنيسة قديمة,في الفترة اللي كانت فيها مدينة يفرن قائمة ,وكان اسمها امرسلون--, اما عن شخصيتها ماعنديش معلومات اللهم انها لها علاقة بامرسلون في الرحيبات حيث اسست اول مدرسة للبنات هناك , في امسين المهم من شطحات خيالي واني نشرب في اقهيوتي طبعا في البلكونة وماتستغربوش ,لان الجلوس قدام البيت عندنا عادي لاننا اقارب في قريتنا ,المهم كونتلها شخصية رائعة ,امرأةعندها تصورات ايجابية مع كل من تتعامل امعاه وعندها قدرة موش عاديةعلي استحضارها في دهنها ديمة ديمة وهدا طبعا وبدون شك اثرعلي نظرتها للناس ونظرة الناس ليها,ولازم تفكيرها صح صح وجميل واهتمامها بتهديب باطنها وصفاء النية وصدق المشاعر, وحب الاخرين, والتعمق في فهم الامور وعندها نظرة ايجابية وماتقيس نفسها بالاخرين ومن الخارج تلبس في اعبي بيضة اثلج لجان في الصيف وفي الشتي اعبي شخمة امخططة,ولاذهب لافضة بالكثير خرص الوجه ,ومغزل الجداد ديمة في ايدها, ومعزتها امعاها ,هدا اللي خلى عندها شخصية اقوية احبوها الجميع ووتقوا في قولها وعملها وربما علمها , وهي وتقت فيهم فادارت شي موش عادي --- شنوهو هدا الشي ؟ الله اعلم- والشاهد انه اكبر اكبير البلاد يسجد داخل مسجدها -واني كونتلها شخصية وانحاول انقلد فيها ,وانتم تقدروا اتقلدوها؟ ان شاءالله
بسم الله
بسم الله اول كلماتي
الثاني انصلوا علي المختار
والثالت عبير تحياتي
والثالت عبير تحياتي
للي فتح تدويني زار
آنستوني ياحبيباتي
قبله يمين وقبله يسار
وتقديري واحتراماتي
وتقديري واحتراماتي
لو زاروه من الشعار
وبوسه بوسه لحفيداتي
وبوسه بوسه لحفيداتي
هيا ناخدكم بغمار
سجل واتفضل باقاتي
سجل واتفضل باقاتي
باقه باقه من لشعار
فل وياسمين قصيداتي
فل وياسمين قصيداتي
مع انسايم تغبق وانوار
والورد الجوري احكياتي
والورد الجوري احكياتي
ولقرنفل جزل السمار
ومسك الليل طرَب مسجاتي
ومسك الليل طرَب مسجاتي
وبراعم اهزيزاوتار
تتناغم مع لون احياتـي
تتناغم مع لون احياتـي
وتتنافر مع الزمن احتار
ان شاء الله ماتخني كلماتي
ان شاء الله ماتخني كلماتي
تعبر عني وعن لفكار
عن واقع عشته عن ذاتي
عن واقع عشته عن ذاتي
عن جملة الناس الحضار
علي بلادي مدني قرياتي
علي بلادي مدني قرياتي
علي العالم ارفيقة اسفار
من تاريخ امي ؤجداتي
من تاريخ امي ؤجداتي
لاتعرف قلم ولاحبار
علي الدنيا الماضي والآتي
علي الدنيا الماضي والآتي
نتايج للي فات ؤصار
ياصبري ياايماآتي
ياصبري ياايماآتي
بحر غارق ماليش اقرار
علي ضوالي ظلماتي
علي ضوالي ظلماتي
وعلي طفى~منها انوار
علي طولي ضفراتي
علي طولي ضفراتي
واللي قصقص منها اشبار
صعودي وركوبي قماتي
صعودي وركوبي قماتي
عوامل شدتني في اغوار
علي لملم ليا اشتاتي
علي لملم ليا اشتاتي
علي حاربونا بالنار
يرحم من جمع ورقاتي
وين عدموا ملفي بقرار
عللي اجبرني لزوم اسكاتي
عللي اجبرني لزوم اسكاتي
واللي علا صوتي اجهار
علي شمعة في احتيمالاتي
علي شمعة في احتيمالاتي
بالك تضوي اغدت اقمار
علي زحمة اطياف اخيالاتي
علي زحمة اطياف اخيالاتي
وياما عددها الصوار
علي متر زدته فـ مشياتي
علي متر زدته فـ مشياتي
عثرت التالي ميل امتار
علي ساندني في اتباتي
علي ساندني في اتباتي
واللي اعقفني لاخ ؤدار
علي امرار اعذاب لوعاتي
علي امرار اعذاب لوعاتي
ومن بره زينه وافخار
سموها صدره في عاداتي
سموها صدره في عاداتي
بهرج علي الفاضي بشمار
علي كبلها ايدياتي
علي كبلها ايدياتي
وسموهم زوجين اصوار
واحد يدفنها رغباتي
واحد يدفنها رغباتي
وبالتاني طموحي ينهار
ؤخلخال اخلخل قدراتي
ؤخلخال اخلخل قدراتي
ؤيغير وجه المسار
وخناق يخنق عبراتي
وخناق يخنق عبراتي
بالك تسمعها لحرار
واتغير كل احساباتي
واتغير كل احساباتي
وحساب اللي اقرالي وثأر
ياجواهر في موروثاتي
ياجواهر في موروثاتي
اغبت وين قعدت اثار
فرزت احجيرة بمحولاتي
فرزت احجيرة بمحولاتي
وياما من لولو واحجار
حاول وافهم اشاراتي
ؤفيه ميات من الشطار
اقدمها للجيل الاتي
اقدمها للجيل الاتي
عمل قيَم فني تذكار
التخلف مانع نهضاتي
التخلف مانع نهضاتي
ورق رابح فيد السمسار
والجهل اسبايب معاناتي
والجهل اسبايب معاناتي
عشت الدنيا اعفاراكيار
وديمه انزنزن ياوخياتي
وديمه انزنزن ياوخياتي
وهدا عرضني لخطار
الله اسددلي خطواتي
الله اسددلي خطواتي
انحقق هدفي في المشوار
نحمد ربي الوقت امواتي
نحمد ربي الوقت امواتي
مع النيت انواصل بازرار
قدامي كل امحطاتي
قدامي كل امحطاتي
لاتاشيره لامطار
ونزود في معلوماتي
انقي شن نبي نختار
ويسعدني انعزَز قدراتي
ويسعدني انعزَز قدراتي
بتشجيعكم وعزومي اكبار
ؤمتيناني لزوجي ؤصحباتي
ؤمتيناني لزوجي ؤصحباتي
ؤخوي ؤخوه واهل الدار
ونخص اصغر بناتي
ونخص اصغر بناتي
لولاها هدا ماصار
انحاول بالمجهود الذاتي
انحاول بالمجهود الذاتي
اني موجوده في قعر الدار
ويا ليبيا لك زغروتاتي
ويا ليبيا لك زغروتاتي
مع تحيات جمعونة مادي الشقروني اخدت هذه الصورة من منتدى يفرن